लीडरशीप मॅटर्स...

(छत्रपती शिवाजी महाराज यांच्या भव्य अश्वारुढ पुतळ्याच्या सुवर्णमहोत्सव समारंभात साक्षात मा. कुलगुरू डॉ. दिगंबर शिर्के यांच्याकडून जाहीर कौतुकोद्गार)

(शिवाजी विद्यापीठातील छत्रपती शिवाजी महाराज यांच्या भव्य अश्वारुढ पुतळ्याची रंजक माहिती)

(छत्रपती शिवाजी महाराज पुतळ्याची माहिती देणारी रील)

माहितीपुस्तिकेचे मुखपृष्ठ

शिवाजी विद्यापीठाचे मा. कुलगुरू डॉ. दिगंबर शिर्के यांच्याकडून विशेष प्रशंसापत्र

शिवाजी विद्यापीठातील छत्रपती शिवाजी महाराज पुतळ्याच्या सुवर्णमहोत्सवानिमित्त बजावलेल्या कामगिरीबद्दल डॉ. आलोक जत्राटकर यांना प्रशंसापत्र प्रदान करताना कुलगुरू डॉ. दिगंबर शिर्के. सोबत (डावीकडून) डॉ. सागर डेळेकर, प्र-कुलगुरू डॉ. प्रमोद पाटील, कुलसचिव डॉ. विलास शिंदे आणि डॉ. वैभव ढेरे.

सहकाऱ्यांकडूनही कौतुक: शाल, पुष्पगुच्छ व पुस्तक भेट देताना सौ. विभा अंत्रेडी. सोबत (डावीकडून) डॉ. वैभव ढेरे, धैर्यशील यादव, अभिजीत रेडेकर, सौ. अनुष्का कदम आणि गजानन पळसे

शिवाजी विद्यापीठाच्या प्रांगणातील छत्रपती शिवाजी महाराज यांच्या भव्य अश्वारूढ पुतळ्याचा सुवर्णमहोत्सव नुकताच ३० नोव्हेंबर आणि १ डिसेंबर २०२४ रोजी विद्यापीठ प्रशासनासह समस्त विद्यापीठप्रेमींनी मोठ्या उत्साहाने आणि जल्लोषाच्या वातावरणात साजरा केला. विद्यापीठानं या पुतळ्याचे शिल्पकार बी.आर. खेडकर यांच्या सर्व म्हणजे नऊ मुलींना त्यांच्या कुटुंबियांसह सन्मानपूर्वक आमंत्रित करून त्यांचा शाल, श्रीफळ आणि शिवछत्रपतींच्या पुतळ्याची प्रतिकृती देऊन सत्कारही केला. या कार्यक्रमात या पुतळ्याची समग्र माहिती देणारी सुवर्णमहोत्सव विशेष पुस्तिका प्रकाशित करण्यात आली.

कुलगुरू डॉ. दिगंबर शिर्के, प्र-कुलगुरू डॉ. प्रमोद पाटील, कुलसचिव डॉ. विलास शिंदे यांच्या मार्गदर्शनाखाली सदरची पुस्तिका, पुतळ्याविषयीचे रील आणि माहितीपट हे मी तयार केले आणि ते इथं माझ्या वॉलवर शेअरही केले आहेत. हे मी केलं, हे सांगण्यासाठी लिहीत नाहीय; तर, ते करण्यासाठी पाठीवर हात ठेवणाऱ्या वरिष्ठांप्रती कृतज्ञता व्यक्त करणं हा आहे. पुतळ्याची माहितीपुस्तिका अगर माहितीचा फलक उभारण्याची संकल्पना मा. कुलगुरूंशी चर्चा करताना मला सुचली नक्कीच होती, मात्र या कल्पनेला उचलून धरीत पाठिंबा देणारं नेतृत्व त्यांच्या ठायी असल्यामुळं या गोष्टी तडीस जाऊ शकल्या. माहिती संकलन, संपादन या सर्व बाबींचं स्वातंत्र्य आणि मोकळीक त्यांच्याकडून लाभली. त्यामुळंच कागदावर कुठेही कसलाही आदेश नसताना केवळ शिवछत्रपतींवरील निष्ठा आणि प्रांगणातील त्यांच्या पुतळ्याविषयी असणारं ममत्व या दोन बाबींमुळं पुतळा सुवर्णमहोत्सवाचा कार्यक्रम अगदी यथासांग आणि देखणेपणानं पार पडला. साऱ्यांचा उत्साह आणि मनासारख्या घडून आलेल्या सर्व गोष्टी यामुळं एक आगळं समाधान लाभलेलं होतंच. तशात मा. कुलगुरूंनी या कार्यक्रमात या साऱ्या करण्याचं जाहीर कौतुक केलं, ही बाब आनंददायी खरीच, पण संकोचून टाकणारी अधिक होती. कुलगुरू म्हणूनच नव्हे, पण डॉ. शिर्के सरांचा स्वभाव हा मुळी थेट आणि प्रांजळ आहे. त्या निर्मळपणातूनच त्यांचं हे सहजकौतुक माझ्या वाट्याला आलं. त्यामुळं उपस्थितांनीही सरांनी घेतलेल्या नोंदीवरून अभिनंदन केलं. फुलटाईम इलेक्शन ड्युटी असतानाही कार्यालयीन काम सांभाळून त्या पलिकडं केवळ प्रेमभावनेतून केलेल्या कामाचं इतकं कौतुक वाट्याला येणं हीच सुखावून टाकणारी बाब होती खरं तर... पण... काल सायंकाळी ऑफिस अवर संपता संपता मा. कुलगुरू सरांनी त्यांच्या कार्यालयात बोलावून मा. प्र-कुलगुरू, कुलसचिव, डॉ. सागर डेळेकर आणि डॉ. वैभव ढेरे या सन्मित्रांच्या साक्षीनं अभिनंदनाचं पत्र देऊन पुनश्च एकदा कौतुकाचा वर्षाव केला की ज्यानं गहिवरुनच आलं. अजिबातच अपेक्षा नव्हती अशी काही, मात्र सरांनी ते घडवून आणलं. निरपेक्षभावानं केलेल्या कार्याची ती वरिष्ठांनी दिलेली महत्त्वाची पोचपावतीच जणू. या गौरवाबद्दल या साऱ्यांप्रती पुनश्च एकवार जाहीर कृतज्ञता व्यक्त करून हा गौरवही पुन्हा महाराजांच्या चरणी अर्पण करतो.

आज त्यापुढची कडी माझ्या तमाम सहकाऱ्यांनी जोडली. (डॉ. ढेरेच त्यामागे असणार, याची खात्री आहेच). या सर्व मंडळींनी आज एकत्र येऊन शाल, पुष्पगुच्छ आणि ग्रंथभेट देऊन अभिनंदनप्रेमाचा इतका वर्षाव केला की त्यानं भारावून गेलो. एकीकडं कामावरील प्रेमाचं कौतुक करत असतानाच जबाबदारीची जाणीवही मनी दृढतर होण्यामध्येच या साऱ्याचं रुपांतर झालेलं आहे. अंगिकृत कामाशी आजवर कधी प्रतारणा केली नाही, येथून पुढंही होऊ देणार नाही, एवढंच या निमित्ताने सांगू इच्छितो... बाकी आपणा सर्वांचं प्रेम हे असंच अखंडित राहो... चांगलं काम करण्याची, सकारात्मकता अबाधित राहण्याची प्रेरणा त्यातून मिळत राहो, हीच काय ती अपेक्षा!

आमचा 'हक्काचा माणूस' मित्रवर्य जगदीश गुरव यांनी कुलगुरू महोदयांच्या कौतुकोद्गाराचा व्हिडिओ अतिशय प्रेमानं पाठवला, त्यांनाही धन्यवाद देणे अगत्याचे आहे.